Ողբերգական ավտովթար Սև լիճ տանող ճանապարհին․ ՀՀ ՊՆ ՈՒԱԶ-ը հայտնվել է ձորում. մահացածները ՊՆ փոխգնդապետներ են, վիրավորները՝ ժամկետային զինծառայողներ
Shamshyan.com-ը գրում է․ Երեկ՝ փետրվարի 19-ին, ողբերգական ավտովթար է տեղի ունեցել Սյունիքի մարզում:
Ժամը 19:40-ի սահմաններում Գեղարքունիքի մարզի բնակիչ 20-ամյա Գոռ Մ.-ն իր վարած ՈՒԱԶ մակնիշի ՀՀ Պաշտպանության նախարարության հաշվեկշռում հաշվառված ավտոմեքենայով ճանապարհի ուժեղ բքի և մերկասառույցի պատճառով Սև լիճ տանող հատվածում դուրս է եկել ճանապարհի երթևեկելի գոտուց, և մոտ 200 մետր մի քանի պտույտ շրջվելով, գլորվելով հայտնվել է ձորում:
Ինչպես հայտնում է ֆոտոլրագրող Գագիկ Շամշյանը, վթարի հետևանքով վարորդ Գոռ Մ.-ն, ուղևոր՝ Արագածոտնի մարզի բնակիչ 21-ամյա Զաքար Զ.-ն մարմնական վնասվածքներով տեղափոխվել են «Գորիս» բժշկական կենտրոն, իսկ ուղևորներ՝ Լոռու մարզի բնակիչ 33-ամյա Զորանդ Ա.-ն և Երևանի բնակիչ 39-ամյա Զորակ Ե.-ն տեղում մահացել են:
Դեպքի վայր են ժամանել ՀՀ Ներքին Գործերի նախարարության Փրկարար ծառայության Սյունիքի մարզային փրկարարական վարչության հրշեջ փրկարարները, ՀՀ ՆԳՆ Ոստիկանության ճանապարհային ոստիկանության 2-րդ սպայական գումարտակի 6-րդ վաշտի 2-րդ դասակի ծառայողները՝ վաշտի հրամանատար Վաչե Ալավերդյանի, դասակի հրամանատար Արմեն Սարգսյանի գլխավորությամբ:
Օպերատիվորեն ժամանել են նաև ՀՀ ՊՆ Ռազմական ոստիկանության Գորիսի ռազմական ոստիկանության ծառայողներն ու Գորիսի հիվանդանոցի բժիշկների հերթպահ խումբը:
Ժամանողները մեծ դժվարությամբ են կարողացել հասնել վթարի վայր որպեսզի դիերն ու վիրավորների տեղափոխեն հիվանդանոց:
Տեղում քննչական աշխատանքները ղեկավարել է Հայաստանի քննչական կոմիտեի Զինվորական քննչական վարչության 9-րդ կայազորային քննչական բաժնի ավագ քննիչ Դանիելյանը, ում կողմից նախաձեռնվել է քրեական վարույթ:
Գ. Շամշյանի տեղեկություններով՝ մահածացներից Զորանդ Ա.-ն ծառայում է ՀՀ ՊՆ N զորամասում հրամանատարի տեղակալ, կոչումով փոխգնդապետ է, Զորակ Ե-ն ծառայում է ՀՀ ՊՆ N զորամասում՝ գումարտակի հրամանատար, կոչումով փոխգնդապետ է, իսկ վարորդ Գոռ Մ-ն և վիրավոր Զաքար Զ.-ն ծառայում են ՀՀ ՊՆ N զորամասում, որպես ժամկետային զինծառայողներ:
