«Նարեկը ժամկետային զինծառայող էր, երկու քույրերի միակ եղբայրը, նպատակ ուներ տնտեսագետ դառնալ»,-«Փաստինֆոյի» հետ զրույցում ասում է Գառնիի Ատոմի անվան Հ. 2 ավագ դպրոցի տնօրենը։
ՀՀ ինքնիշխան տարածքի նկատմամբ մայիսի 12-ին ադրբեջանական ագրեսիան սանձելիս զոհված 20-ամյա Նարեկ Բաղդասարյանը Կոտայքի մարզի Գառնի համայնքից էր: Նրան ընդամենը 47 օր էր մնացել զորացրվելու համար։
«Չափից դուրս հարգված խելոք հավասարակշռված և զուսպ տղա էր Նարեկը։ Անչափ մեծ էր հարգանքը դեպի մեծերը»,— ասում է դպրոցի տնօրենն ու հավելում, որ զսպվածության հետ մեկտեղ դպրոցում առաջադեմ էր՝ մասնակցում էր դպրոցական բոլոր միջոցառումներին։
«Նոր եմ խոսել դասղեկի հետ. դժվարանում էր խոսել։ Իրենց դասարանում ընդամենը չորս տղա էին։ Բոլորն էլ ծառայում են»,— ասում է դպրոցի տնօրենը։
2021 թվականին ավարտելով դպրոցը՝ Նարեկն ընդունվել էր Հայաստանի պետական տնտեսագիտական համալսարան, նպատակ ուներ տնտեսագետ դառնալ։